يووميات مواطن على الفاتورة . - فواز خيو ..

17:33 11-10-2022

دايما البعض بيتحامل عالحكومة وبيخترع أشياء لينتقدها .

فعلا إذا بنراجع بعض قراراتها بنشوفها منطقية ومفيدة كمان ، مثلا قرار العطلة الأخيرة ما حدا تذمر منو .

ثانيا قرار إلغاء التوقيت الشتوي وتثبيت الصيفي ، هذا مهم كثير ، أولا سهرتي عالورق بتبدا بكير ، وثانيا فعلا الحكومة خبيرة برمجة وعقل باطن ، يعني انت بعز الثلج بتتخيل انو الصيف بعدو مستمر ، والخيال بجمد حواسك وما بتشعر بالبرد ، وبتوفر ثمن المازوت والمازوت لعل هالمعثرين التجار يستفيدو بقرشين  ، 

عام 86 سكنت بالشام وما كنت متزوج ، مريت من جانب مجمع يلبغ تأملتو وقلت : لو يعهدوني اياه كهربا بتكون صفقة كبيرة إلي .

بعد عشر سنين تزوجت وصار ابني سرجون مهندس مدني ويمكن اذا مر من جنبو بقول : لو بعهدوني اياه إكساء بتكون صفقة كبيرة إلي  ،

وأنا بتوقع  انو يتزوج سرجون ويجيه ولد ويكبر ويفتح مكتب عقاري جنبو ويقول : لو بقدر أجرو عالعظم .

شوووووو قصتو بقلب دمشق وعاري ، شايفين منظرو جميل هيك ؟

شو هالمعجزة اللي بتخلي بناء ضخم بقلب دمشق عدة عقود بهالشكل ؟ 

عمرو حيطان خارجية واكسوها عالأقل منشان المنظر ، عاصمة هاي  . 

طلبت نقل تقاعدي على تأمينات لسويدا ، قالو ارجاع بعد اسبوعين ، ليجيبو الاصبارة من المستودع بصحنايا ، رجعت بعد 20 يوم والاضبارة مش جاي ، اخذنا رقم الموظف اللي بروح يجيب الأضابير وحكيت معو بدو آخذو طلب على صحنايا وعالأقل بدها 75 ألف ليرة  .

أية كهوف يصر البعض على إدخالنا فيها .

صرنا جماعة الكهف المتجدد ، كل يوم بنفيق وبنلاقي كل شي متغير ، مش بس قيمة العملة ،

قيمتنا نحنا ..