يومييات مواطن عالفاتورة . - فواز خيو ..

17:54 15-06-2022

دايما نحنا مشغولين لدرجة انو القمر بيدخل برجنا وبظل يوم كامل بضيافتنا ، وما بنعرف فيه . ولا حد بقدملو فنجان قهوة ، بس شاطرين نقول للحبيبة يا قمر ، وبيجي القمر وما بنحس فيه . هاي حياتنا شعارات وخطط خمسية وعشرية عالفاضي . هلق القمر بمرحلة اكتمال من مبارح وليومين قادمين ، وانا خبير طاقة ، استفيدو مني ، بنقدر المسا نعمل تنفس طاقي ، استرخاء وشهيق بطيء من الأنف بحيث نعد لل 7 أثناء الشهيق ، ونحصر النفس ثانيتين ليطلع الأوكسجين عالدماغ ، هذا إذا ظل فينا دماع ، وزفير بنفس البطء لكن من الفم . نكرر العملية ثلاث مرات ثم نجري التأمل وأثناء التأمل نطلق التمنيات ونتخيلها محققة ، مثلا : نتخيل الأسعار نزلت للنصف وأكثر ، نتخيل الدولار نزل لل 2000 ، نتخيل أننا نسمع تصريحات لا تخلخل ما تبقى من عقولنا ، وان تتوقف اللجان التي تسهر على مصالحنا لتبتكر ضرائب جديدة أو تضاعف المطلوب . التقرير الطبي تضاعف من ال 200 ليرة لل 6000 دفعة واحدة ، جواز السفر من ال 19 ألف لل 60 ، وصارو يعطو موعد عالمنصة لأشهر وهذا بيفتح باب البازارات عند البعض لأنها باب رزق جديد ومعظم القرارات تصدر آخر الليل . لما بقول الحكومة بتسهر من أجلنا بتفوعو بوجهي ، والله أحيان بيسهرو للصبح . ألله يعين الناس يا زلمي . مبارح أنجزت انجاز كبير ، لاقيت الباذنجان نازل سعرو شوي ، جبت 2 كيلو وسويت متبل ، يا ما أطيبهن ، وصل لل 4000 ، والبندورة نزلت ، كلو رح ينزل . مبارح احتجت كيس نايلو بالبيت وما لاقيت ، قلت بروح عالدكانة بشتري اغراض ولازم يعطيني كيس ، اشتريت أشياء مش محتاجها هلق ب 15 ألف ليرة بس عطاني كيس وكبير كمان . أقسم انو هيك مشاريع كثيرة عبتنشغل . شايفين عبطمح صير مسؤول ههههه . المهم لا تنسو التأمل معزز بالأمنيات ، ولكن بعد الاسترخاء . انتبهو لترتيب الأحرف بالكلمة .